ফাৰ্মাচীৰ লাইচেন্স প্ৰদানৰ নামত ধন লৈ আটক এজন...

ডিজিটেল সংবাদ, নুমলীগড়ঃ বোকাখাত আৰক্ষী থানাৰ অধীনস্থ নুমলীগড় তিনিআলিত ফাৰ্মাচীৰ লাইচেন্স প্ৰদানৰ নামত ধন লৈ এজন যুৱক সোমবাৰে আৰক্ষীৰ জালত পৰে ৷ জানিব পৰামতে, যোৰহাটৰ নিবাসী যুৱকজনে নিজকে সংশ্লিষ্ট বিভাগৰ কৰ্মচাৰী বুলি পৰিচয় দি নুমলীগড়ৰ এজন লোকৰ পৰা ফাৰ্মাচীৰ লাইচেন্স প্ৰদানৰ নামত ৫০ হাজাৰ টকা নগদ ধন নিয়ে ৷ কিন্তু, লাইচেন্সখন দিয়ে যদিও সম্পূৰ্ণ ভুৱা লাইচেন্স বুলি লোকজনে সদৰি কৰে ৷

এইক্ষেত্ৰত নিজকে ৰাজু হাতীকাকতি বুলি পৰিচয় দিয়া প্ৰৱঞ্চকজনে আৰক্ষীৰ সন্মুখতে ১৫ হাজাৰ টকা ধন লোৱাৰ কথা স্বীকাৰ কৰে ৷ লগতে তেওঁ ভুৱা লাইচেন্স দিয়া নাই বুলিও প্ৰকাশ কৰে ৷ কিন্তু, ভুক্তভোগী লোকজনে এই প্ৰৱঞ্চকে বহু লোকক ঠগাই এনেদৰে ধন সংগ্ৰহ কৰি আহিছে বুলি অভিযোগ কৰে ৷ আজি আবেলি ভুক্তভোগী লোকজনে বিষয়টো বোকাখাত আৰক্ষীক অৱগত কৰাৰ লগতে প্ৰৱঞ্চকজনক কৌশলেৰে নুমলীগড়লৈ মাতি আনে। পিচত বোকাখাত আৰক্ষীয়ে ঘটনাস্থলীত উপস্থিত হৈ যুৱকজনক আটক কৰে ৷

আৰু পঢ়কঃ আটাছুৰ স্মাৰকপত্ৰঃ চুকাফা মৈদামৰ মাটি কেনেকৈ ম্যাদী পট্টা হ’ল !