নিষিদ্ধ পি এফ আই, চি এফ আইয়ে নগাঁৱৰ পৰা চলাইছিল কাম কাজ...

ডিজিটেল সংবাদ,নগাঁওঃ দেশৰ গৃহ মন্ত্ৰালয়ে নিষিদ্ধ ঘোষণা কৰা দুই সংগঠন পপুলাৰ ফ্ৰন্ট অৱ ইণ্ডিয়া আৰু কেম্পাচ ফ্ৰন্ট অৱ ইণ্ডিয়াই নগাঁও জিলাটো কাম কাজ চলাই আছিল ৷ দুয়োটা সংগঠনে জিলাখনত কাম কাজ চলাই থকাৰ নিশ্চিত তথ্য লাভ কৰিছে আৰক্ষীয়ে ৷ জিলাখনৰ চামগুৰি আৰু ৰূপহীৰ পৰা দুয়োটা সংগঠনে কাম কাজ চলাই আহিছিল ৷

পি এফ আইৰ নগাঁও জিলা সমিতিৰ মুখ্য কাৰ্যালয় চামগুৰিত ৷ চামগুৰিৰ পুথিখাইটি কাৱৈমাৰীত কাৰ্যালয় স্থাপন কৰি সংগঠনটোৱে কাম কাজ চলাই আছিল ৷ সংগঠনটোৰ স্বয়ম্ভূ সভাপতি ৰহমত উল্লাহ কাচিমীয়ে নিজৰ ঘৰতে কাৰ্যালয় স্থাপন কৰি পি এফ আইৰ সাংগাঠনিক কাম কাজ আন সতীৰ্থৰে মিলি চলাই গৈছিল ৷

উল্লেখ্য যে পি এফ আইৰ জিলা সভাপতি ৰহমত উল্লাহ কিছুদিন পূৰ্বে আৰক্ষীৰ জালত পৰিছিল ৷ ৰহমতক আৰক্ষীয়ে গ্ৰেপ্তাৰ কৰি নিয়াৰ হাতত গতাই দিছিল ৷ পি এফ আইৰ জিলা সম্পাদকৰ দায়িত্ব আছে আব্দুল আজিজ ৷

অন্যহাতে কেম্পাচ ফ্ৰন্ট অৱ ইণ্ডিয়া নামৰ সংগঠনটোৰ ৰূপহীৰ পৰা কাম কাজ চলাই থকা বুলি জানিব পৰা গৈছে ৷ কেম্পাচ ফ্ৰন্ট অৱ ইণ্ডিয়া চমুকৈ চি এফ আই নগাঁও জিলা সমিতিৰ স্বয়ম্ভূ সভাপতি জনৰ নাম হৈছে দিলদাৰ হুছেইন ৷

সংগঠনটোৰ সম্পাদকৰ দায়িত্ব আছে আৰিফ খান ৷ জনৈক দিলদাৰ আৰু আৰিফে ভ্ৰাম্যমান শিবিৰৰ জৰিয়তে নগাঁও জিলাত সাংগাঠনিক কাম কাজ চলাই আছিল। উল্লেখযোগ্য যে কেন্দ্ৰীয় গৃহ মন্ত্ৰালয়ে ৫ বছৰৰ বাবে নিষিদ্ধ কৰা পপুলাৰ ফ্ৰন্ট অৱ ইণ্ডিয়াৰ ভগ্নী সংগঠন হৈছে কেম্পাচ ফ্ৰন্ট অৱ ইণ্ডিয়া ৷