ডিজিটেল সংবাদ, গুৱাহাটীঃ চলিত ১৭ সংখ্যক ইণ্ডিয়ান প্ৰিমিয়াৰ লীগ [আই পি এল] ৰ অন্তিম দুখন লীগৰ খেলত অংশ লোৱাৰ বাবে গুৱাহাটীলৈ অহা ৰাজস্থান ৰয়েলছৰ এটা ১৩ জনীয়া দলে আজি কাজিৰঙা ভ্ৰমণ কৰে৷ ইফালে, দলটোৰ আন কিছু সদস্যই গুৱাহাটীত ব্ৰহ্মপুত্ৰ নদীত ৰিভাৰ ছাফাৰিত লুইতৰ মনোৰম পৰিৱেশ আৰু সৌন্দয্য উপভোগ কৰে৷ অসমৰ প্ৰাকৃতিক পৰিৱেশৰ লগত দলটোৰ দেশী-বিদেশী খেলুৱৈ তথা বিষয়াসকলক চিনাকি কৰি দিয়াৰ উদ্যেশে ৰাজস্থান ৰয়েলছৰ ফালৰ পৰা এই ব্যৱস্থা কৰা হয়
আজি পুৱা ৰয়েলছৰ এটা ১৩ জনীয়া দল প্ৰথমে ৰাওনা হয় নগাঁৱৰ প্ৰাকৃতিক পৰিৱেশত অৱস্থিত মিছা প’লো ক্লাবলৈ৷ উল্লেখ্য যে ‘ৰয়েল ডিফেণ্ডাৰ ৰিভাৰ এণ্ড ৰোড জাৰ্নিজ’ৰ ছখন ৰেঞ্জ ৰভাৰ ডিফেণ্ডাৰ বাহনত উঠি তথা নিজে চলাই দলটোৱে বিলাসীতা আৰু দুঃসাহসিক যাত্ৰাৰ আমেজ লয়৷ উল্লেখ্য যে এই অত্যাধুনিক বাহনত গাড়ী চলোৱাৰ ৰোমাঞ্চ বিচৰাসকলৰ বাবে স্ব-ড্ৰাইভিং বিকল্প উপলব্ধ৷ প্ৰযুক্তিগতভাৱে উন্নত লেণ্ড ৰভাৰ ডিফেণ্ডাৰ চলোৱাৰ অভিজ্ঞতা লাভ কৰাৰ অনন্য সুযোগ লাভ কৰে অতিথিসকলে৷ যাৰ ফলত সদস্যসকলে অসমৰ বৈচিত্ৰময় পৰিৱেশৰ মাজেৰে এক অনন্য অভিজ্ঞতা লাভ কৰে৷ মিছা প’লো ক্লাবত গল্ফ , টেবুল টেনিছ খেলাৰ লগতে পুৱাৰ আহাৰ গ্ৰহণ কৰে৷
তাৰপৰা দলটো ৰাওনা হয় কাজিৰঙালৈ৷ বাগৰি ৰেঞ্জত ৰয়েলছৰ ১৩ জনীয়া দলটোক বিশেষ ব্যৱস্থাৰে কাজিৰঙাৰ জীৱ-জন্তু আৰু পাকৃতিক পৰিৱেশ উপভোগ কৰাৰ সু-ব্যৱস্থা কৰা হয়৷ কাজিৰঙা ৰাষ্ট্ৰীয় উদ্যানৰ চেণ্ট্ৰেল ৰেঞ্জত এক ৰোমাঞ্চকৰ জীপ ছাফাৰীৰ জডিয়তে ৰয়েলছ পৰিয়ালে অঞ্চলটোৰ চহকী জৈৱ বৈচিত্ৰ্যক ওচৰৰ পৰাই প্ৰয্যবেক্ষন কৰাৰ সুযোগ লাভ কৰে৷ স্বাভাৱিকতে ৰোমাঞ্জকৰ আছিল এই যাত্ৰা৷
কাজিৰঙাৰ পৰা ওলাই দলটো ৰাওনা হয় তেজপুৰৰ বালিপাৰাত থকা অত্যাধুনিক তথা মনোৰম প্ৰাকৃতিক পৰিৱেশত অৱস্থিত ৰিজ’ৰ্ট ৱাইল্ড মাছিৰলৈ৷ উল্লেখ্য যে অসমৰ ৰসাল সেউজীয়া পৰিৱেশৰ মাজত অৱস্থিত ৱাইল্ড মাছিৰ অতুলনীয় বিলাসীতাই দেশী-বিদেশী লোকক স্মৰণীয় অভিজ্ঞতা দিয়ে৷ ঐতিহ্যমণ্ডিত এই বাংলোত অতিথিসকলে পূব হিমালয়ৰ যাদুক পৰম আৰাম আৰু শৈলীৰে অনুভৱ কৰাৰ সুযোগ লাভ কৰে৷ ৱাইল্ড মাছিৰত উপস্থিত হোৱাৰ লগে লগে অতিথিসকলক অসম তথা উত্তৰ-পূৱৰ লোক সাংস্কৃতিৰ পৰিচয়ো স্থানীয় শিল্পীৰ সাংস্কৃতিক অনুষ্ঠানৰে দিয়া হয়৷ নিশা ৱাইল্ড মাছিৰতে দলটো থাকিব৷ কাইলৈ দলটো পুনৰ কাজিৰঙা হৈ মিছা প’লো ক্লাবত দুপৰীয়াৰ আহাৰ গ্ৰহন কৰি গুৱাহাটী পাব৷
ইফালে, আজি নিশা গুৱাহাটীৰ উজান বজাৰ ঘাটত ৰাজস্থান ৰয়েলছ দলৰ ক্ৰিকেটাৰসকলে ব্ৰহ্মপুত্ৰ নদীত ৰিভাৰ ছাফাৰিত লুইতৰ মনোৰম পৰিৱেশ আৰু সৌন্দয্য উপভোগ কৰে৷ কাইলৈ দলটোৰ কিছু সদস্যই পবিতৰা ভ্ৰমণ কৰাৰ সম্ভাৱনা আছে৷ উল্লেখ্য যে গুৱাহাটীক নিজৰ দ্বিতীয় ঘৰ হিচাপে লোৱা ইণ্ডিয়ান প্ৰিমিয়াৰ লীগ [আই পি এল] ৰ প্ৰথম ছিজনৰ চেম্পিয়ন ৰাজস্থান ৰয়েলছে চলিত ১৭ সংখ্যক আই পি এলৰ অন্তিম দুখন খেল বৰ্ষাপাৰাৰ এ চি এ ষ্টেডিয়ামত খেলিবলৈ আহিছে৷ যোৱানিশা এ চি এ ষ্টেডিয়ামত ৰয়েলছ পঞ্জাৱ কিংছৰ বিৰুদ্ধে পৰাস্ত হয়৷ অহা ১৯ মে’ত দলটো মুখামুখি হ’ব কলকাতা নাইট ৰাইডাৰ্ছৰ৷ ইতিমধ্যে দলৰ প্লে-অফলৈ যোগ্যতা নিশ্চিত হৈছে৷
