উল্লেখনীয় সংসদীয় প্ৰদৰ্শন : দেশৰ ১৭ গৰাকী সাংসদক ‘সাংসদ ৰত্ন’ বঁটা প্ৰদান

ডিজিটেল ডেস্ক : উল্লেখনীয় সংসদীয় প্ৰদৰ্শনৰ বাবে দেশৰ ১৭ গৰাকী সাংসদক সাংসদ ৰত্ন বঁটাৰে সন্মানিত কৰা হৈছে। এই বঁটাৰে সন্মানিতসকলৰ ভিতৰত আছে ভৰত্ৰুহৰী মাহতাব (বিজেপি, ওড়িশা), এন কে প্ৰেমাচন্দ্ৰন (বিপ্লৱী সমাজবাদী পাৰ্টি, কেৰালা), সুপ্ৰিয়া চুলে (এনচিপি-এছপি, মহাৰাষ্ট্ৰ) আৰু শ্ৰীৰাং আপ্পা বাৰ্ণ (শিৱসেনা, মহাৰাষ্ট্ৰ)কে ধৰি সোতৰজন সংসদ। লগতে আছে  অসম তথা বিজেপি সাংসদ দিলীপ শইকীয়া। 

উল্লেখযোগ্য যে, এই আটাইকেইগৰাকীৰে সংসদীয় গণতন্ত্ৰলৈ অসাধাৰণ আৰু সামঞ্জস্যপূৰ্ণ অৱদানৰ বাবে এই বঁটা আগবঢ়াইছে এটা বেচৰকাৰী সংস্থাই । এই সন্মানত চাৰিটা বিশেষ জুৰী বঁটাও অন্তৰ্ভুক্ত কৰা হৈছে।

এই সম্পৰ্কত সংসদীয় পৰিক্ৰমা মন্ত্ৰী কিৰেন ৰিজিজুৱে কয় যে স্বীকৃতি পোৱা আন সাংসদসকল হৈছে ৰবি কিষাণ (বিজেপি), নিশিকান্ত ডুবে (বিজেপি), অৰবিন্দ সাৱন্ত (শিৱ সেনা-ইউবিটি), স্মিতা উদয় ৱাঘ (বিজেপি), নৰেশ ম্হাস্কে (শিৱসেনা), বৰষা গাইকৱাদ (কংগ্ৰেছ), মেধা কুলকাৰ্ণী (বিজেপি), প্ৰবীণ পেটেল (বিজেপি), বিদ্যুৎ বৰাণ মাহাটো (বিজেপি), দীনেশ শৰ্মা (বিজেপি), দিলীপ শইকীয়া (বিজেপি), পি.পি. চৌধুৰী (বিজেপি), মদন ৰাথোৰ (বিজেপি), চি.এন. আন্নাদুৰাই (ডি এম কে)। সমিতি শাখাত ভৰত্ৰুহৰী মাহতাবৰ অধ্যক্ষতাত স্থায়ী বিত্ত সমিতি আৰু ড০ চৰণজিৎ সিং চান্নী (কংগ্ৰেছ)ৰ অধ্যক্ষতাত কৃষি সম্পৰ্কীয় স্থায়ী সমিতিক তেওঁলোকৰ প্ৰতিবেদনৰ মানৰ বাবে এই স্বীকৃতি দিয়া হৈছে । 

ৰিজিজুৱে প্ৰাইম পইণ্ট ফাউণ্ডেচনে আয়োজন কৰা সংসদ ৰত্ন বঁটা প্ৰদান অনুষ্ঠানত ভাষণ দি এনে বঁটাই সাংসদসকল আৰু অধিক সক্ৰিয়তাৰে কাম কৰাত অনুপ্ৰাণিত কৰিব বুলি মন্তব্য কৰে।