ৰাষ্ট্ৰীয় ক্ৰীড়া মহোৎসৱলৈ কলিয়াবৰৰ চিমি গগৈ...

ডিজিটেল সংবাদ, কলিয়াবৰঃ গুজৰাটৰ আহমেদাবাদত ৩৬ সংখ্যক ৰাষ্ট্ৰীয় ক্ৰীড়া মহোৎসৱৰ অসম মহিলা ফুটবল দলত স্থান লাভ কৰিছে কলিয়াবৰৰ মহিলা ফুটবলাৰ চিমি গগৈয়ে। কলিয়াবৰ ক্ৰীড়া সন্থাৰ অধীনৰ ফ্ৰেণ্ডশ্বীপ ক্লাৱৰ ফুটবলাৰ চিমি গগৈ বৰ্তমান গুৱাহাটীত অনুশীলনত ব‍্যস্ত।

যোৱা ৮ ছেপ্তেম্বৰত ডুমডুমাত সামৰণী পৰা ২৫ সংখ‍্যক আন্তঃজিলা চিনিয়ৰ মহিলা ফুটবল প্ৰতিযোগিতাত কলিয়াবৰ দলক প্ৰতিনিধিত্ব কৰি নিপুন ক্ৰীড়া শৈলীৰে সকলোৰে দৃষ্টি আকৰ্ষণ কৰিছিল চিমি গগৈয়ে।

সেই সূত্ৰে মহিলা ফুটবল দলৰ নিৰ্বাচকৰ বাচনিত উঠি অসম মহিলা ফুটবল দলত স্থান লাভ কৰে চিমিয়ে। চিমিৰ এই সাফল‍্যত উৎফুল্লিত কলিয়াবৰবাসী।

উল্লেখ‍্য যে, অহা ২৯ ছেপ্তেম্বৰৰ পৰা ১২ অক্টোবৰলৈ গুজৰাটৰ আহমাবাদত হ'ব লগা ৩৬ সংখ‍্য ৰাষ্ট্ৰীয় ক্ৰীড়া মহোৎসৱ লৈ ২৭২ জনীয়া অসম দলটো অহা ২৭ ছেপ্তেম্বৰত বিমানেৰে ৰাওনা হ'ব।