ট্ৰেণ্ডছ-প্রতিদিন টেলেন্ট হান্ট ছিজন-৩: ক'ত-কেতিয়া হ'ব প্রতিযোগিতাৰ অডিচন পর্ব

ডিজিটেল সংবাদ, গুৱাহাটী: প্রতিভাৱানসকলক উপযুক্ত মঞ্চ দিয়াৰ প্রয়াসেৰে ট্রেণ্ডছ-প্রতিদিন গোষ্ঠীয়ে পুনৰ এবাৰ ২০২৪ বৰ্ষৰ ট্রেণ্ডছ-প্রতিদিন টেলেন্ট হান্ট, ছিজন-৩ শীর্ষক প্রতিযোগিতা অনুষ্ঠিত কৰাৰ আয়োজন কৰিছে। নৃত্য, গীত, অভিনয় আৰু বাদ্য বাদন শিতানত অনুষ্ঠিত কৰিবলগীয়া এই প্রতিযোগিতাৰ অডিচন পর্ব ক্রমে ডিব্রুগড়, নগাঁও, কোকৰাঝাৰ, শিলচৰ আৰু গুৱাহাটীত অনুষ্ঠিত কৰা হ'ব।

অহা ৩১ আগষ্টত আৰম্ভ হৈ ২২ ছেপ্টেম্বৰত অন্ত পৰিবলগীয়া এই প্রতিযোগিতাৰ অডিচন পর্ব ক্রমে ডিব্ৰুগড়ত ৩১ আগষ্ট আৰু ১ ছেপ্টেম্বৰত, কোকৰাঝাৰত ৪ আৰু ৫ ছেপ্টেম্বৰত, নগাঁৱত ৭ আৰু ৮ ছেপ্টেম্বৰত, শিলচৰত ১৪ আৰু ১৫ ছেপ্টেম্বৰত আৰু গুৱাহাটীত ২১ আৰু ২২ ছেপ্টেম্বৰত অনুষ্ঠিত কৰা হ'ব। প্রতিযোগিতাত ষষ্ঠৰ পৰা দ্বাদশ শ্ৰেণীত অধ্যয়নৰত শিক্ষার্থীসকলে অংশগ্রহণ কৰিব পাৰিব আৰু যোগদানৰ বাবে অনুষ্ঠানস্থলীত বিনামূলীয়া পঞ্জীয়নৰ ব্যৱস্থা থাকিব।

এইবাৰৰ প্রতিযোগিতাত বিচাৰক হিচাপে অংশগ্রহণ কৰিব ক্ৰমে অভিনেত্রী নিশিতা গোস্বামী, সংগীত শিল্পী ৰূপম ভূঞা আৰু নৃত্য শিল্পী মেঘৰঞ্জনী মেধিয়ে। সর্বমুঠ ৫ লাখ টকাৰ পুৰস্কাৰ সম্বলিত এই প্রতিযোগিতা অডিচনৰ পাচত এলিমিনেচন ৰাউণ্ড আৰু তাৰ পাচত ফাইনেল ৰাউণ্ডেৰে গঠিত হ'ব। ট্রেণ্ডচ-প্রতিদিন টেলেন্ট হান্ট ২০২৪, ছিজন-৩ প্রতিযোগিতাৰ বিভিন্ন খণ্ডসমূহ ৭ ছেপ্টেম্বৰৰ পৰা প্রত্যেক শনিবাৰ আৰু দেওবাৰে নিশা প্রতিদিন টাইম চেনেলত সম্প্ৰচাৰ কৰা হ'ব।

Also Read: এণ্ড্ৰিউ উইলৰ চাহ বাগিচা বিক্ৰীৰ সিদ্ধান্তক সমৰ্থন তেৰছ গোৱালাৰ...