এমাহ পূৰ্বে খালিস্তানী বুলি পৰিচয় পোৱা অৰ্শ্বদীপ সিঙৰ সন্মুখত নতশিৰ পাকিস্তানৰ বাবৰ আজম আৰু মহম্মদ ৰিজৱান

ডিজিটেল ডেস্ক : টি-২০ বিশ্বকাপৰ গ্ৰুপ পৰ্যায়ৰ খেলত ভাৰতৰ অনভিজ্ঞ বলাৰ অৰ্শবদীপ সিঙৰ সন্মুখত নতশিৰ হ'ল পাকিস্তানী বেটিং বিক্ৰম বাবৰ আজম আৰু মহম্মদ ৰিজৱান । অষ্ট্ৰেলিয়াৰ পেচ বলিঙৰ বাবে খ্যাত বাউন্সাৰ পিটছ মেলব'ৰ্ণত বিশ্বকাপত ভাৰতীয় দলৰ হৈ অভিষেক ঘটাই অৰ্শ্বদীপ সিঙে বিশ্বকাপ কেৰিয়াৰ প্ৰথম ব'লটিতে পতন ঘটালে পাকিস্তানৰ দুৰ্গ বাবৰ আজমৰ । পাকিস্তানৰ অপেনাৰদ্বয়ৰ দ্বিতীয় গৰাকী বেটছমেন মহম্মদ ৰিজৱানেও ৪ ৰাণতেই ইনিংছ সামৰি উভতিব লগীয়া হয় পেভিলিয়নলৈ কেৱল অৰ্শ্বদ্বীপৰ বলিং পৰাক্ৰমৰ বাবেই । পাকিস্তানে ১০ উইকেটৰ অন্তত সংগ্ৰহ কৰে ১৫৭ ৰান ।   

উল্লেখ্য যে, প্ৰায় এমাহ পূৰ্বে অনুষ্ঠিত এছিয়া কাপত এই দুয়োটা দলৰ মাজতেই অনুষ্ঠিত খেলত এক গুৰুত্বপূৰ্ণ কেছ হেৰুৱাইছিল অৰ্শ্বদ্বীপ সিঙে । তাৰ পাছতেই ইন্টাৰনেটৰ বিভিন্ন চছিয়েল মিডিয়া মাধ্যমত খেলুৱৈ গৰাকীৰ বিৰুদ্ধে বিদ্বেষ প্ৰকাশ কৰিছিল অনুৰাগীসকলে । আনকি, খেলুৱৈ গৰাকী পাঞ্জাৱী মূলৰ হোৱাৰ বাবেই খালিস্তানী বুলিও উপহাস কৰা হৈছিল । বহু মাধ্যমত আকৌ ৰাষ্ট্ৰ বিৰোধীও আখ্যা দিয়া হৈছিল খেলুৱৈ গৰাকীক ।

এই সকলো উপহাসৰ প্ৰত্যুত্তৰ স্বৰূপে আজি অৰ্শ্বদ্বীপ সিঙে আগবঢ়ালে এক স্মৰণীয় প্ৰদৰ্শন । কেৱল ৪ অভাৰতে ৩২ ৰা‍নৰ বিপৰিতে সংগ্ৰহ কৰিলে ৩ টা কৈ উইকেট ।