ভাৰতৰ SCOৰ বৈঠক বাদ দিব পাকিস্তানৰ মুখ্য ন্যায়াধীশে

ডিজিটেল ডেস্কঃ ২০২৩ চনৰ ১০ৰ পৰা ১২ মাৰ্চলৈ নতুন দিল্লীত অনুষ্ঠিত হ'বলগীয়া শ্বাংহাই সহযোগিতা সংস্থা (Shanghai Cooperation Organization ) চমুকৈ SCOৰ মুখ্য ন্যায়াধীশসকলৰ বৈঠকত পাকিস্তানে অংশগ্ৰহণ নকৰে। এক বিবৃতিত পাকিস্তানৰ বৈদেশিক কাৰ্যালয়ৰ মুখপাত্ৰ মুমতাজ জাহৰা বালোচে এই কথা উল্লেখ কৰিছে।

তেওঁ কয় যে, “এছচিঅ'ৰ এজন সক্ৰিয় সদস্য হিচাপে পাকিস্তানে নিয়মীয়াকৈ সকলো এছচিঅ' কাৰ্যকলাপত অংশগ্ৰহণ কৰি আহিছিল আৰু গঠনমূলকভাৱে তেওঁলোকৰ ফলাফলত অৰিহণা যোগায়। পিছে নিৰ্ধাৰিত বৈঠকৰ তাৰিখত তেওঁৰ অনিবাৰ্য প্ৰতিশ্ৰুতিৰ বাবে, পাকিস্তানৰ মাননীয় মুখ্য ন্যায়াধীশে উচ্চতম ন্যায়ালয়ৰ মুখ্য ন্যায়াধীশসকলৰ এছচিঅ' বৈঠকত ১০-১২ মাৰ্চ ২০২৩ তাৰিখলৈ অংশগ্ৰহণ কৰিব নোৱাৰিব।” সেই অনুসৰি বৈঠকৰ বৰ্তমানৰ অধ্যক্ষ/আয়োজকক তথা ভাৰতীয় সমকক্ষ সকলকৰ ওচৰত দুখ প্ৰকাশ কৰে ৷

এক্সপ্ৰেছ ট্ৰিবিউনৰ মতে, অনুষ্ঠানটোত উপস্থিত থাকিবলৈ ভাৰতৰ আমন্ত্ৰণ পাকিস্তানৰ মুখ্য ন্যায়াধীশ গৰাকীয়ে গ্ৰহণ কৰিছিল। পিছে এতিয়া শ্বেহবাজ শ্বৰীফ নেতৃত্বাধীন দেশখন একমাত্ৰ ৰাষ্ট্ৰ যিয়ে ভাৰতৰ দ্বাৰা আয়োজিত এছচিঅ'ৰ মুখ্য ন্যায়াধীশ বৈঠক বাদ দিব। নতুন সদস্য ইৰাণকে ধৰি আন সকলো সদস্যই ব্যক্তিগতভাৱে বৈঠকত অংশগ্ৰহণ কৰিব।

আনহাতে ভাৰতে পাকিস্তানৰ বৈদেশিক মন্ত্ৰী বিলাৱাল ভুট্টো-জাৰ্দাৰীকো এই বছৰৰ মে' মাহত গোৱাত অনুষ্ঠিত হ'বলগীয়া এছচিঅ'ৰ বৈদেশিক মন্ত্ৰীসকলৰ বৈঠকলৈ আমন্ত্ৰণ জনাইছে। অৱশ্যে পাকিস্তানৰ বৈদেশিক মন্ত্ৰী বৈঠকখনত উপস্থিত থাকিব নে নাই সেই সিদ্ধান্তত উপনীত হ'ব পৰা নাই ৰাষ্ট্ৰখন।

এছচিঅ' সন্মিলনৰ, বৈদেশিক মন্ত্ৰীসকলৰ বৈঠকত ভাৰত হৈছে বৰ্তমানৰ সভাপতি,  য'ত চীন, কাজাখস্তান, কিৰগিজস্তান, ৰাছিয়া, তাজিকিস্তান আৰু উজবেকিস্তানো আছে। আঞ্চলিক মঞ্চৰ সভাপতি হিচাপে, ভাৰতে সদস্য ৰাষ্ট্ৰসমূহৰ মুখ্য ন্যায়াধীশসকলৰ বৈঠককে ধৰি কেইবাটাও অনুষ্ঠান আয়োজন কৰিবলৈ সাজু হৈছে। ভাৰতে এপ্ৰিলত পৰিবহন, সংস্কৃতি, প্ৰতিৰক্ষা মন্ত্ৰীসকলৰ বৈঠক অনুষ্ঠিত কৰাৰো আশংকা আছে। ইফালে, গোৱাত বৈদেশিক মন্ত্ৰীসকলৰ বৈঠক মে'ত আৰু ২৫ জুনত দিল্লীত এখন সন্মিলন অনুষ্ঠিত হ'ব বুলিও আগতীয়া চৰ্চা দেখিবলৈ পোৱা গৈছে। যিহেতু ভাৰত এই বছৰৰ জি-২০ আৰু এছচিঅ' দুয়োটা গোটৰ অধ্যক্ষ।

উল্লেখ্য যে ছাংহাই সহযোগিতা সংস্থা (এছচিঅ') হৈছে এক ইউৰেচিয়ান ৰাজনৈতিক, অৰ্থনৈতিক, আন্তঃৰাষ্ট্ৰীয় সুৰক্ষা আৰু প্ৰতিৰক্ষা সংগঠন। ভৌগোলিক পৰিসৰ আৰু জনসংখ্যাৰ ক্ষেত্ৰত ই হৈছে বিশ্বৰ সৰ্ববৃহৎ আঞ্চলিক সংগঠন, যিয়ে ইউৰেছিয়াৰ প্ৰায় ৬০% এলেকা,  বিশ্বৰ জনসংখ্যাৰ ৪০% আৰু বিশ্বব্যাপী জিডিপিৰ ৩০% তকৈ অধিক সামৰি লয়।

এছচিঅ' হ’ল ১৯৯৬ চনত চীন গণৰাজ্য,  কাজাখস্তান,  কিৰগিজস্তান,  ৰাছিয়া আৰু তাজিকিস্তানৰ মাজত গঠন কৰা ছাংহাই ফাইভৰ উত্তৰাধিকাৰী। ২০০১ চনৰ ১৫ জুনত এই ৰাষ্ট্ৰসমূহৰ নেতা আৰু উজবেকিস্তানৰ নেতাসকলে ছাংহাইত মিলিত হৈ গভীৰ ৰাজনৈতিক আৰু অৰ্থনৈতিক সহযোগিতাৰে এটা নতুন সংগঠন ঘোষণা কৰে। ইয়াৰ পিছতে এছচিঅ' চাৰ্টাৰখন ২০০২ চনৰ ৭ জুলাইত স্বাক্ষৰিত হৈছিল আৰু ২০০৩ চনৰ ১৯ ছেপ্টেম্বৰত কাৰ্যকৰী হৈছিল। ইয়াৰ সদস্যপদ তেতিয়াৰ পৰা আঠখন ৰাজ্যলৈ সম্প্ৰসাৰিত হৈছে, ভাৰত আৰু পাকিস্তানে ৯ জুন ২০১৭ তাৰিখে যোগদান কৰিছিল। তদুপৰি কেইবাখনো দেশ পৰ্যবেক্ষক বা সংলাপ অংশীদাৰ হিচাপেও জড়িত হৈ আছে। আৰু এই এছ.চি.ও. ইয়াৰ সৰ্বোচ্চ সিদ্ধান্ত গ্ৰহণকাৰী সংস্থা ষ্টেট কাউন্সিলৰ (এইচ.এছ.চি.) মুৰব্বীসকলৰ দ্বাৰা পৰিচালিত হয়, যি বছৰত এবাৰ কৈ মিলিত হয়।

Also Read: হেমাংগ বিশ্বাসৰ পৰা হেম বৰুৱাই আড্ডা দিয়া ঘৰটোৱে গৰকিলে শতবৰ্ষ...