নাগালেণ্ড জে ডি ইউত অঘটন ! জে ডি ইউৰ সাধাৰণ সম্পাদক কিটোহো এছ ৰোটোখাই দলৰ পৰা পদত্যাগ

ডিজিটেল সংবাদ, বেকাজানঃ ৪ ফেব্ৰুৱাৰী, নাগালেণ্ড জে ডি ইউ অঘটন । ঘাছপানী দ্বিতীয় সমষ্টিৰ পৰা প্ৰাৰ্থীত্ব ঘোষণা কৰাৰ মাত্ৰ কেইদিনমানৰ পিছতে জনতা দল ইউনাইটেডৰ সাধাৰণ সম্পাদক কিটোহো এছ ৰোটোখাই ৰাজ্যিক কাৰ্যবাহী বিষয়ববীয়াৰ সৈতে দলৰ পৰা পদত্যাগ কৰিছে।

শুকুৰবাৰে সংবাদমেলৰ সময়ত এই কথা ঘোষণা কৰি জে ডি ইউৰ ৰাজ্যিক সম্পাদক ওবেদ ছুমীয়ে দলৰ ৰাজ্যিক সভাপতিৰ নেতৃত্বৰ ওপৰত আস্থা হেৰুৱাৰ কথা উল্লেখ কৰি দলীয় সদস্যপদৰ পৰা গণ পদত্যাগ কৰাৰ বাবে সৰ্বসন্মতিক্ৰমে সংকল্প লোৱা বুলি কয়। নগা ৰাইজৰ বৃহত্তৰ স্বাৰ্থত দল ত্যাগ কৰিবলৈ বাধ্য হোৱা বুলি ৰোটোখাই কয়।

ইফালে জেডিইউৰ ৰাষ্ট্ৰীয় সাধাৰণ সম্পাদক আফাক আহমদ খানে এক প্ৰেছ বিজ্ঞপ্তিযোগে দলটো আচৰিত হোৱা বুলি উল্লেখ কৰি জেডিইউৰ একাংশ তথাকথিত ৰাজ্যিক বিষয়ববীয়াই অকৰ্তৃত্বশীল বৈঠক অনুষ্ঠিত কৰি সামূহিক পদত্যাগ কৰা বুলি দাবী কৰা বুলি অভিযোগ উত্থাপন কৰে।

প্ৰেছ বিবৃতি কোৱা হৈছে যে, জে ডি ইউৰ ৰাষ্ট্ৰীয় কাৰ্যালয়ে নাগালেণ্ডৰ ৰাজ্যিক দলৰ সভাপতি চেঞ্চুমো এনছন লোথাৰ প্ৰতি সম্পূৰ্ণ সমৰ্থন অব্যাহত ৰাখিব আৰু দলৰ হাইকমাণ্ডৰ আস্থা নিৰপেক্ষ। বিবৃতিটোত আৰু কোৱা হৈছে যে জে ডি ইউয়ে ৰ’টোখাক বহিষ্কাৰ কৰে আৰু তেওঁৰ বিৰুদ্ধে উপযুক্ত আইনী ব্যৱস্থা গ্ৰহণ কৰিব।