আইৰ সমান হ'ব কোন ! ভূমিকম্পৰ দুমাহ পাছত পুনৰ মাতৃৰ কোলাত দেখা গ'ল ধ্বংসস্তূপৰ পৰা উদ্ধাৰ হোৱা কণমানিক

ডিজিটেল ডেস্ক : ২০২৩ বৰ্ষৰ ৬ ফেব্ৰুৱাৰীত তুৰস্ক আৰু ছিৰিয়াক কপাই গৈছিল এক বিধ্বংসী ভূমিকম্পই । প্ৰায় ৪০ হেজাৰৰো অধিক লোকে প্ৰাণ হেৰুৱাৰ ওপৰিও গৃহহীন হৈছিল লক্ষাধিক লোক । প্ৰত্যেক দিনেই এক ন ন তথ্যই কন্দুৱাই গৈছিল সমগ্ৰ বিশ্বক । ক'ৰ'বাত যদি পিতৃয়ে মৃত কন্যাক এৰি চিকিৎসালয়লৈ যাবলৈ অস্বীকাৰ কৰিছিল আন ক'ৰ'বাত আকৌ ৭ বছৰীয়া কণমানি এজনীয়ে দুবছৰীয়া ভাতৃক ধ্বংসস্তূপৰ মাজৰ আৱৰি আছিল আঘাত নাপাবলৈ । খহি পৰা অট্টালিকাটোৰ দেৱাল এখন যদি বাগৰি পৰিবলৈ হয় তেন্তে কনমাণিজনীও যে নিমিষতে ধ্বংসস্তূপৰ মাজত নিচিহ্ন হৈ যাব সেই কথা তাইক ক'বলৈ নাছিল কাৰো সাহস ।

এই সকলোৰে মাজত বিখ্যাত হৈ পৰিছিল এটি শিশু । তিনিমহীয়া শিশুটি ৫ দিনলৈ আৱদ্ধ হৈ আছিল ধ্বংসস্তূপৰ মাজত । ১২৮ ঘন্টা অনহাৰে কটোৱা শিশুটিৰ পৰিয়ালৰ কোনো সদস্যৰেই কোনো শুংসূত্ৰ পোৱা হোৱা নাছিল তেতিয়া । সমগ্ৰ বিশ্বৰ হেজাৰ হেজাৰ পৰিয়াল আগুৱাই আহিছিল শিশুটিৰ দায়িত্ব ল'বলৈ ।

সৌভাগ্যক্ৰমে বিধ্বংসী ভূমিকম্পই দুটা মাহ অতিক্ৰম কৰাৰ পাছত শিশুটিৰ মাতৃক বিচাৰি পোৱা গৈছে তুৰস্কৰেই এখন চিকিৎসালয়ত । মাতৃ গৰাকী আৰু শিশুটিৰ ডি এন এ পৰীক্ষা সম্পন্ন কৰাৰ পাছত শিশুটিৰ প্ৰকৃত মাতৃ বুলি নিশ্চিত হৈছিল তুৰস্কৰ চৰকাৰ । তাৰ পাছতেই দুমাহ পাছত পুনৰ এবাৰ মাতৃগৰাকীৰ কোলাত দেখা গ'ল দুৰ্ভগীয়া শিশুটিক । মাতৃৰ সৈতে পুনৰ্মিলনৰ এই আলোকচিত্ৰই এতিয়া সমাদৰ লাভ কৰিছে সমগ্ৰ বিশ্বত ।

Also Read: উত্তৰ কোৰিয়াৰ সাম্ৰাজ্যবাদী শাসনৰ সকলো ৰহস্য উদঙাই দিয়া যুৱতীগৰাকী